《萬千星輝頒獎典禮2018》現正進行，各位藝員攞獎梗係開心，點知最爆嘅係蕭正楠同曹永廉奪「最受歡迎電視拍檔」時，公開講黃翠如已經成為佢太太喇！
蕭正楠同曹永廉憑《兄弟大茶飯》奪「最受歡迎電視拍檔」，由黃翠如、洪永城頒獎。蕭正楠講得獎感受時，正式公開黃翠如為太太，令全場藝員同事超驚喜！
黃翠如親自頒獎
蕭正楠多謝太太令佢成為一個識點樣照顧人嘅男人，全場叫佢哋錫返啖先，二人都有求必應啊！
廣告時間蕭正楠攬住太太條腰，二人笑到見牙唔見眼
二人非常激動，其他同事都紛紛上前祝賀！
今年八月黃翠如上蕭正楠主持的《美女廚房》做嘉賓，被男友踩完全唔識煮嘢食的她，竟煮出令人讚不絕口的魚粥，眾主持起鬨叫蕭正楠拎出求婚戒指即場求婚，又叫二人去紅棉道註冊，蕭正楠表現尷尬，而黃翠如則委屈流淚。性格率直玩起來癲喪的黃翠如，口講唔急嫁，其實已發最後通牒畀蕭正楠，誓必一年內成為人妻！
蕭正楠與黃翠如拍拖四年無風無浪，早已同居雙方又見曬家長，多次被傳婚訊但只聞樓梯響，原來只欠蕭正楠一個行動。出身小康之家的蕭正楠是個很穩陣的人，與黃翠如拍拖後，他的事業開始有起色，形象入屋後，拍劇做男一廣告代言亦接踵而來，不過他自覺財力未夠，未係時間娶黃翠如入門。
蕭正楠與黃翠如早已是公認的一對，屢次被傳結婚都未成事，全因蕭正楠自覺未儲夠老婆本向女友求婚。
據知情者透露：「Edwin (蕭正楠) 好怕人哋話佢係百億女婿，佢想真係儲到一筆錢，買到一層樓畀翠如揸手先諗結婚，所以到依家仍未正式向翠如求婚，佢話想留個美好嘅回憶，到時一定會有大大粒鑽戒，唔會令翠如失望。翠如知道男友咁為佢又上進當然開心，不過佢10月就37歲，再加上佢唔係好想上位爭視後嗰種人，所以舊年停工周遊列國做慈善探訪，Edwin就留喺香港拍劇拍節目繼續搏殺，翠如話就話唔急結婚，因為佢唔想公開畀太大壓力Edwin，不過佢睇愛情睇得咁重，點會唔想結婚？早前翠如帶Edwin返娘家食飯，翠如屋企人都有提過結婚嘅事，翠如即場幫Edwin擋駕話有曬計劃，畀埋最後通牒Edwin，希望一年內會成事。其實Edwin同翠如都係好慳嘅人，除咗日常生活基本開支，最多就係去旅行，佢哋一齊儲緊錢，應該都離目標唔遠。」要娶父親是上市公司主席黃永華的「百億千金」黃翠如入門，蕭正楠當然要努力搵銀，除了在無綫拍劇keep住人氣，兩年前年他積極進軍飲食界，投資漢堡包店做老闆，經營一年多生意已上軌道，至今已開設分店成功滾大老婆本。
無綫一線小生花旦買少見少，黃翠如與蕭正楠絕對是近年的潛質股，二人都受力捧，既拍劇又主持節目，向視後視帝進發。
收到女友的最後通牒，蕭正楠當然要加快腳步，最近被問何時結婚，他終於有實質答案：「希望不久嘅將來會結啦，結婚要計劃好多嘢，你估好似《天若有情》咁，捉佢上機車，掟個垃圾桶，攞件婚紗就話結婚咩？好多嘢要安排，照顧雙方家長好多嘢要搞。」
