老婆懷胎10月嘅日子其實都真係幾快，眨嚇眼就過咗。其實我哋都有計劃生仔，但我記得初初老婆同我講話有左，我都有啲愕然，因為自己已經36歲，估唔到仲有得生。不過講真，其實初初我係唔想有小朋友，你估養一個小朋友容易架，自己都養唔掂啦，何況有小朋友會令到我無曬自由，我個腦海裏面經常放浮起監獄風雲裏面嘅畫面，再配合尹光首歌：我冇自由我，失自由，傷心痛哭眼淚流，我行錯路，我差初步，此餐心傷透。 不過，既然有咗冇辦法㗎啦。

老婆懷胎初期，我十分之緊張，我緊張嘅其實唔係個仔，係我老婆嘅身體。未陀BB嘅時候我老婆身體真係好差，經常都好攰，有冇精神又大懵，行兩步又話腳痛，講多兩句大聲說話都唔夠氣。但出奇地，佢陀BB呢段時間，佢好強好健康，鬼咁精神，仲行得快過我健步如飛。可能因為個仔，佢爆發左前所未有嘅能量，所以我真係好佩服佢，亦都覺得佢好偉大好叻女。大肚呢段期間，講真真係好忙，又要買呢樣又要買果樣，真係好很煩，而我亦都怕麻煩又燥底，所以我經常都發脾氣。其實我好對老婆唔住，成日受我啲脾氣。不過，大佬呀，樣樣都係錢，係有買唔係又買，邊有咁多錢！所以我好大壓力，又怕老婆辛苦，又要聽講座，又有好多野要準備，加上第一胎又唔識點湊，究竟搵工人湊，搵外母定係自己阿媽湊返，住邊？夠唔夠住？好多好多咁嘅問題，真係人都癲。

可能初初唔識認啦，久而久之慢慢咁就習慣咗啦，唔覺得煩，反而覺得好期待新生命嘅誕生。我亦都去學習點樣湊小朋友，點樣幫佢沖涼啦、餵奶、換片、著衫，甚至乎去學習一啲關於嬰孩嘅知識。而每一次見到我個仔係我老婆個肚裏邊郁嚟郁去我都覺得好開心好好笑，我諗我已經徹底改變，有一個唔鍾意細路仔嘅人變成了一個負責任嘅準爸爸。

其實，好多準爸爸都會面對呢啲問題，覺得好徬徨好睏惑，唔知點做好，因為要承擔一啲改變，而呢啲改變會令到你手足無措，從而加深你嘅壓力。我想講嘅係：其實爸爸都有產前抑鬱證，所以現今社會都必須由父母雙方面去一起去承擔小朋友嘅一切，關心媽媽之餘亦都要關心爸爸。